منظمة الصحة العالمية أعلنت رسمياً تحوّل كورونا الى درجة " الوباء "

منظمة الصحة العالمية أعلنت رسمياً تحوّل كورونا الى درجة " الوباء "، بعد ما كان تقييمه الفترة اللي فاتت انه مرض منتشر بشكل خطير.
...

الموضوع مش ظريف. لما تلتقي بحد، بلاش الخمستلاف بوسة وحضن اللي بيعبّروا عن شوقك له. ولو مش مقتنع بالموضوع، وشايف أنه ضروري التعبير عن ترحابك بالآخرين بالطريقة دي، فعلى الأقل احترم الطرف الآخر لما يرفض التحية بالبوس والأحضان، وبلاش تشعر بالإهانة من التصرف دا ، أو السخرية منه انه قليل الاصل أو " طري ". احترم قلق الناس، لو انت نفسك مش مستشعر القلق دا.

اذا في إمكانك تمنع المصافحة باليد ، يكون كويس. اذا لم يكن لديك القدرة لدا لظروف قهرية، واضطريت للمصافحة، بعد المصافحة اغسل ايدك بالصابون لمدة كافية.

ولما يجيلك دور برد عادي، خليك في سريرك اشرب شوربة واتفرج على التلفزيون وقلّب في الفيس، لحد ما دور البرد يروح. لا تخرج من البيت فتزاول الناس، ولا تستظرف مع اللي حواليك وتقلقهم.

وبشكل عام، كل مشوار أو مكان أو اتجاه فيه تجمّعات ناس كتير، في إمكانك انك تلاقي بدائل له بخيارات تشمل اختلاط اقل بالناس، لا تتردد انك تختار البديل اللي فيه اختلاط اقل بالناس.

ويابا أحلى مسا ع الانطوائيين اللي مش فارق معاهم معظم الكلام دا.

عماد أبو الفتوح